Shoqata e Prodhuesve të Kosovës ka dal me pesë kërkesa për Qeverinë Kurti dhe institucionet tjera. Në një takim që e kanë pasur sot me Odën Ekonomike të Kosovës kanë kërkuar veprime të menjëhershëm dhe të përgjegjshëm institucional për mbrojtjen e prodhimit vendor.
Pas takimit, ata kanë kërkuar nga institucionet shtetërore që të mbrojnë zinxhirin vendor të prodhimit, pas tensioneve që u shpërfaqën në sektorin e qumështit.
Ndër kërkesat kryesore të këtyre prodhuesve është publikimi i menjëhershëm i rezultateve të analizave që janë marrë në qumështore javën e kaluar.
Në njoftimin e lëshuar pas takimit, ata kanë specifikuar kërkesat e tyre.
“1. Publikimi i menjëhershëm i rezultateve të analizave zyrtare. I bëjmë thirrje Agjencisë së Ushqimit dhe Veterinarisë (AUV) dhe Ministrisë së Bujqësisë, Pylltarisë dhe Zhvillimit Rural që të publikojnë rezultatet e mostrave të marra, bazuar në analiza laboratorike zyrtare dhe transparente, me qëllim eliminimin e çdo paqartësie në treg”, thuhet në kërkesën e parë.
Në kërkesën e dytë theksohet mbështetja konkrete institucionale.
“2. Mbështetje konkrete institucionale për prodhuesit vendorë. Kërkojmë nga Qeveria e Republikës së Kosovës ndërmarrjen e masave urgjente për mbështetjen e zinxhirit prodhues vendor, përmes politikave fiskale nxitëse, lehtësimeve administrative, diplomacisë ekonomike dhe mekanizmave të tjerë mbështetës.”, është thënë në kërkesat e tyre.
Më pas, kërkohet nga institucionet që t`i ndalin deklarimet dhe veprimeve që dëmtojnë sektorin pa bazë faktike.
“3. Ndalja e deklarimeve dhe veprimeve që dëmtojnë sektorin pa bazë faktike. Kërkojmë që çdo pretendim për cilësinë apo sigurinë e produkteve ushqimore të trajtohet përmes institucioneve kompetente dhe procedurave profesionale, duke shmangur veprimet që krijojnë pasiguri te konsumatorët dhe dëmtojnë padrejtësisht prodhuesit vendorë.”, theksohet në kërkesat e tyre.
Ndër të tjera, prodhuesit kanë kërkuar që të iu mundësohet eksporti i produkteve të tyre.
“4. Përshpejtimi i hapave për eksport në tregjet evropiane. Kërkojmë ndërmarrjen e masave konkrete që do t’u mundësojnë prodhuesve vendorë eksportin e produkteve me bazë shtazore në tregun evropian, përfshirë avancimin e proceseve për njohjen e certifikatave përkatëse të lëshuara nga institucionet vendore”, thuhen në kërkesën e katër të tyre.
Kurse, në kërkesën e tyre të fundit, ata kanë kërkuar nga institucionet që veprimet e tyre të jenë të bazuara në ligj.
“5. Respektimi i standardeve profesionale në raportim dhe mbikëqyrje. Institucionet dhe të gjitha palët e përfshira duhet të veprojnë mbi bazën e ligjeve në fuqi dhe standardeve profesionale, duke garantuar një treg të sigurt, konkurrues dhe të drejtë për të gjithë operatorët”, është thënë në kërkese e tyre të pestë.
