Prishtinë, 20 tetor 2025 – Kryetari i Lidhjes Demokratike të Kosovës (LDK), Lumir Abdixhiku, ka reaguar pas marrëveshjes së nënshkruar nga kandidati i partisë në Vushtrri, Xhafer Tahiri, me Lëvizjen Vetëvendosje (LVV), duke e quajtur këtë çështje “periferike” që do të trajtohet pas përfundimit të balotazhit.
Në një postim në Facebook, Abdixhiku bëri të ditur se ka mbledhur kandidatët e LDK-së që garojnë në raundin e dytë të zgjedhjeve lokale dhe se fokus i partisë do të jetë vetëm në garat ku ajo është pjesëmarrëse.
“Çdo energji, çdo fokus, çdo aktivitet i LDK-së në këto ditë do të drejtohet vetëm për LDK-në. Çështjet tjera periferike, ato të pas humbjeve e protagonizmave kohë-humbëse, do të trajtohen menjëherë pas 9 nëntorit; dhe atë qartë e drejtë,” shkroi Abdixhiku.
Ky formulim është parë si një sinjal i qartë i pakënaqësisë së kryetarit të LDK-së ndaj veprimit të Tahirit, i cili nënshkroi marrëveshje pa miratim të Kryesisë së partisë.
Tahiri, që doli i treti në raundin e parë në Vushtrri, vendosi të përkrahë kandidatin e LVV-së, Sylejman Meholli, në balotazh kundër kandidatit të PDK-së, Ferit Idrizi. Marrëveshja u nënshkrua sot në prani të kryetarit të LVV-së, Albin Kurti.
Abdixhiku theksoi se LDK-ja është e fokusuar në garat e saj në nëntë komuna, përfshirë Prishtinën, Pejën, Fushë Kosovën, Gjilanin, Vitinë, Obiliqin, Junikun, Dragashin dhe Suharekën, ndërsa dy të tjera tashmë janë fituar nga kjo parti.
