Kryetari i Lidhjes Demokratike të Kosovës (LDK), Lumir Abdixhiku, ka reaguar pas vendimit të Gjykatës Kushtetuese, e cila konstatoi se kryesuesi i seancës konstituive nuk ka vepruar në pajtim me aktgjykimin e kësaj gjykate në rastin KO124/25, të 26 qershorit 2025.
Përmes një postimi në Facebook, Abdixhiku e quajti vendimin “një fitore të madhe të demokracisë dhe të Republikës”, duke theksuar se Gjykata Kushtetuese i dha të drejtë të plotë kërkesave dhe lëndës së hartuar nga LDK-ja.
“Siç e kemi thënë sa e sa herë, partia e parë kishte uzurpuar foltoren, me imponim kishte ndryshuar rendin e ditës dhe me kokëfortësi për plot 48 herë kishte shkelur Kushtetutën e Kosovës duke insistuar në votimin e fshehtë – para dhe pas aktgjykimit të Gjykatës Kushtetuese. Votimi i fshehtë nuk pranohet. Jo kushtetues, i konstatuar! Urdhëroheni të mundësoni demokracinë në Republikën e lirë të Kosovës. Ky është verdikti sot”, shkroi Abdixhiku.
