Bota e futbollit është tronditur nga lajmi i trishtë për vdekjen e ish-futbollistit profesionist gjerman Sebastian Hertner, i cili humbi jetën në një aksident të rëndë në Mal të Zi.
34-vjeçari ndërroi jetë të dielën në vendpushimin e skive Savin Kuk, pasi ra nga një teleferik nga një lartësi rreth 70 metra, njoftojnë mediat lokale.
Sipas informatave, aksidenti ndodhi teksa Hertner po udhëtonte me teleferik së bashku me bashkëshorten e tij 30-vjeçare. Pas rënies së futbollistit, gruaja e tij mbeti e bllokuar në teleferik, ndërsa u shpëtua më vonë nga shërbimet e emergjencës. Ajo ka pësuar thyerje të këmbës dhe ka marrë trajtim mjekësor.
Sebastian Hertner kishte një karrierë të pasur në futbollin gjerman. Ai ka luajtur në Bundesligën 2 me skuadra të njohura si 1860 Munich, Erzgebirge Aue dhe Darmstadt, ndërsa së fundmi ishte aktiv si kapiten i ekipit të divizionit të pestë ETSV Hamburg.
Autoritetet malazeze kanë nisur hetimet për zbardhjen e plotë të rrethanave të aksidentit, ndërsa komuniteti sportiv ka shprehur ngushëllime për familjen dhe miqtë e futbollistit të ndjerë.
Ngjarja ka lënë pas dhimbje të madhe në botën e sportit, duke rikthyer vëmendjen te siguria në zonat turistike malore gjatë sezonit dimëror.
