Një operacion i madh antidrogë i koduar “Delivery” ka çuar në arrestimin e pesë personave në rajonin e Prishtinës, pas një ndjekjeje dramatike që përfundoi në Vushtrri.
Hetuesit e Drejtorisë për Hetimin e Trafikimit me Narkotikë, pas një pune intensive në terren, fillimisht identifikuan dy persona të dyshuar për shpërndarje të marihuanës dhe kokainës në kryeqytet.
Aksioni kulmoi të mërkurën rreth orës 14:00 në Veternik, ku të dyshuarit, të cilët lëviznin me një veturë Golf 8, tentuan të ikin me shpejtësi të lartë sapo panë policinë, duke rrezikuar seriozisht trafikun.
Ndjekja vijoi në disa drejtime—nga Fushë-Kosova në Podujevë dhe më pas në magjistralen Prishtinë–Mitrovicë—derisa policia arriti t’i ndalojë në hyrje të Vushtrrisë.
Gjatë kontrollit, u sekuestruan mbi 2.2 kilogramë marihuanë, ndërsa një sasi tjetër prej mbi 1.1 kilogramësh dyshohet se u hodh nga të dyshuarit gjatë arratisjes.
Në bastisjet e mëvonshme në katër lokacione në Prishtinë, policia gjeti drogë shtesë, peshore digjitale, mbi 4 mijë euro para të gatshme, valuta të huaja, dy vetura dhe katër telefona mobilë.
Po ashtu, në një veturë tjetër u zbuluan 25 qese me kokainë, ndërsa në një nga lokacionet u identifikua edhe një hapësirë e përshtatur si “Call Center”, ku u sekuestruan pesë laptopë dhe u përfshinë në hetim edhe njësitë për krime kibernetike.
Operacioni përfundoi me pesë persona të arrestuar, të cilët me urdhër të prokurorit janë ndaluar për 48 orë.
