Aksioni i Prokurorisë Speciale – dihen emrat e dy të arrestuarve

Arbër Gashi, shef i njësisë në Prizren të ndërmarrjes publike “Ekoregjioni” dhe Ragip Zejna, pronar i kompanisë “Dielli Construction”, janë dy të arrestuarit në aksionin e urdhëruar nga Prokuroria Speciale të hënën.

Të dy dyshohen për përfshirje në një aktivitet prokurimi të ndërmarrjes publike “Ekoregjioni”, tha Prokuroria Speciale në një njoftim për media të hënën.

Gashi dyshohet për veprën penale “Keqpërdorim i pozitës apo autoritetit zyrtar”, ndërsa Zejna për “Keqpërdorim dhe Mashtrim në prokurimin publik”.

Prokuroria Speciale tha se hetuesit policorë kanë kryer bastisje në ambientet e ndërmarrjes publike “Eko Regjioni” në Prizren, si dhe të kompanisë “Dielli Construction” në Ferizaj.

“Urdhër kontrolli është realizuar si një hap i rëndësishëm procedural, në kuadër të hetimeve që Prokuroria Speciale e Republikës së Kosovës është duke i zhvilluar lidhur me dyshimet për një aktivitet të tenderimit”, tha Prokuroria.

Tenderi për të cilin besohet se janë arrestuar dy të dyshuarit lidhet me blerjen e pesë kamionëve dhe një autofshese nga ndërmarrja “Ekoregjioni”. Vlera e tenderit është rreth 400 mijë euro. /Paparaci.com