Prishtinë, 2 Tetor 2025 — Dronë serbë dyshohet se kanë shkelur hapësirën ajrore të Kosovës, duke rritur tensionet në rajon dhe shqetësuar institucionet e sigurisë. Lajmi vjen në një kohë kur çështja e sovranitetit dhe sigurisë ajrore është në qendër të debatit publik.
Murat Makolli, përfaqësues i sigurisë, tha për Klan Kosova se Serbia tenton vazhdimisht të regjistrojë çdo pikë të kazermave ushtarake dhe institucioneve të sigurisë së Kosovës. “Këto lajme nuk më bëjnë të ndihem mirë, pasi këta dronë nuk duhet ta kalojnë hapësirën ajrore të Republikës së Kosovës, e cila është nën mbikëqyrjen e KFOR-it. Serbia tenton çdo herë të regjistrojë çdo pikë të kazermave tona apo institucioneve të sigurisë. KFOR-i mendoj që është përgjegjës për këto kalime. Ka ardhur koha që kryeministri [në detyrë] ta thërrasë komandantin e KFOR-it dhe Këshillin e Sigurisë për ta diskutuar këtë çështje”, tha ai në “Kosova Today”.
Nga ana tjetër, eksperti i sigurisë, Fidair Berisha, paralajmëroi rrezikun që paraqesin dronët serbë. “Ka tash e dy muaj që realisht dronët nga Serbia po hyjnë në këtë anë, e që kanë cenuar sigurinë ajrore. Duhet bashkëpunim për të gjetur fillin e këtij zhvillimi”, tha Berisha.
Ngjarja vjen ndërkohë që tensionet në rajon mbeten të larta, ndërsa Kosova kërkon mbrojtje të plotë të hapësirës ajrore dhe sovranitetit të saj./ Klan.KS
