Policia e Kosovës ka reaguar sot pasditen e së martës ndaj një raportimi për një mjet të dyshuar pranë një automjeti të parkuar në afërsi të një pompe të derivateve, në rrugën Prishtinë – Fushë Kosovë.
Zëdhënësja për media në rajonin e Prishtinës, Flora Ahmeti, ka konfirmuar për mediat se incidenti është raportuar rreth orës 16:00.
“Rreth orës 16:00 kemi pranuar informatën për një mjet të dyshuar në rrugën Prishtinë – Fushë Kosovë, saktësisht në një automjet të parkuar në afërsi të një pompe të derivateve”, deklaroi Ahmeti.
Sipas saj, njësitet policore kanë dalë menjëherë në vendin e ngjarjes dhe kanë nisur ndërmarrjen e veprimeve operative të nevojshme për menaxhimin e situatës.
Aktualisht nuk është bërë e ditur nëse bëhet fjalë për ndonjë mjet të rrezikshëm, ndërsa hetimet po vazhdojnë dhe zona përreth është bllokuar për të garantuar sigurinë publike.
