Kreu i Prokurorisë së Posaçme (SPAK), Altin Dumani, reagoi ashpër gjatë raportimit të tij në Komisionin e Ligjeve në Kuvendin e Shqipërisë, pas një pyetjeje të drejtpërdrejtë nga deputeti Tedi Blushi. Pyetja kishte të bënte me një takim të mundshëm mes Dumanit dhe ish-agjentit të FBI-së, Charles McGonigal.
Dumani e konsideroi pyetjen të papranueshme dhe pa asnjë bazë, duke e cilësuar si një spekulim të rrezikshëm që po dëmton opinionin publik dhe integritetin e institucionit që ai drejton.
“Ishte e bukur kjo, a jam takuar me Charles McGonigal. Se si mund të bësh një pyetje të tillë, nuk e di. Që të bësh një pyetje të tillë duhet një indicie, një e dhënë. Ku është një indicie, një e dhënë?! Ore unë jam Altin Dumani, përfaqësoj Prokurorinë e Posaçme”, – deklaroi ai me tone të larta.
Dumani shtoi se ka dëgjuar për figurën e McGonigal për herë të parë në janar të vitit 2023, kur në media u publikuan të dhëna mbi një aferë të mundshme të përfshirjes së tij në aktivitete të dyshimta.
“Opinionin publik e mbushët, ka takuar McGonigal, pa asnjë përgjegjësi, pa pikë përgjegjësie! Edhe emrin dhe figurën për herë të parë në janar 2023 u publikuan të dhëna apo fakte për një aferë të mundshme të McGonigal”, – theksoi kreu i SPAK.
Reagimi i tij vjen në një kohë kur SPAK është në qendër të vëmendjes publike dhe politike, për shkak të hetimeve të ndjeshme që po kryen ndaj zyrtarëve të lartë dhe ish-funksionarëve të shtetit shqiptar.
