Duhet të jetë vendi i duhur për t’u strehuar nga nxehtësia përvëluese. Por pishina e Gërmisë në Prishtinë është mezi gjysmë e mbushur, shkruan mediumi amerikan Associated Press.
Vitin e kaluar, 4,000 deri në 5,000 njerëz e vizitonin atë çdo ditë gjatë sezonit të pikut.
Por sot, rrëshqitëset e ujit dhe shezlonet janë bosh.
Pishina ka nevojë për 20,000 metra kub ujë.
Dhe teksa Evropa po vuan nga një valë e nxehtë përvëluese, ky vëllim është i vështirë për t’u siguruar, veçanërisht pasi objekti mbështetet në malet përreth për furnizimin e tij.
“Ne kemi ndoshta valën më të fortë të nxehtësisë që po prek aktualisht vendin tonë dhe gjithashtu rajonin, dhe për fat të keq nuk kemi qenë në gjendje të hapim pishinën më të madhe publike në vend.
Normalisht e mbushim me ujë nga malet në vetëm gjashtë ditë, por për shkak të mungesës së reshjeve dhe thatësirës, procesi tashmë po na merr më shumë se tre javë”, shpjegon Bardh Krasniqi, drejtor Ekzekutiv i Sport Marketing, i cili menaxhon pishinën.
Vala e të nxehtit dhe mungesa e zgjatur e reshjeve po e vështirëson jetën në të gjithë Kosovën, shkruan Associated Press.
Temperaturat kanë arritur në 35 gradë celsius këtë javë dhe Instituti i Shëndetësisë u ka bërë thirrje njerëzve të qëndrojnë larg ekspozimit të drejtëpërdrejt në diell.
Instituti ka paralajmëruar të moshuarit, fëmijët dhe ata me probleme shëndetësore të qëndrojnë në shtëpi.
Në qendër të Prishtinës, një vendpushim i përkohshëm ofron pak hije për punonjësit e shëndetësisë që të flasin me vendasit.
“Vala e të nxehtit që ka filluar të mbretërojë këtu dhe në rajon mund të ndikojë negativisht në mirëqenien dhe shëndetin e qytetarëve. Në qytet, si një shërbim parësor mjekësor, ne kemi filluar t’u ofrojmë shërbime shëndetësore qytetarëve, të tilla si matja e presionit të gjakut, parametrat jetësorë dhe ofrimi i këshillave mjekësore se si të mbrohemi nga nxehtësia dhe temperaturat e larta”, thotë Arieta Pula, një specialiste në mjekësinë familjare.
Të gjitha vendet në rajonin e Ballkanit Perëndimor janë prekur nga nxehtësia.
Në Shqipëri lumenjtë janë pothuajse të thatë, për shkak të mungesës së reshjeve gjatë dimrit dhe pranverës./Periskopi/
