Partia Demokratike e Kosovës po shkon drejt zgjedhjeve të 28 dhjetorit me një listë të fuqizuar, ku ndër emrat më të spikatur është Arben Mustafa, i renditur me numrin 5. Ekonomist i njohur dhe profesor universitar, Mustafa shihet si një nga shtyllat profesionale të ekipit me të cilin PDK synon t’i japë vendit drejtim të ri pas këtyre zgjedhjeve.
Me doktoratë nga Staffordshire University në Mbretërinë e Bashkuar dhe përvojë të gjerë akademike në fushën e financave, Mustafa ka ndërtuar reputacionin e një eksperti që flet me analiza të argumentuara dhe vizion të qartë ekonomik. Që nga angazhimi i tij në PDK, ai shërben si koordinator i Departamentit për Financa, duke kontribuuar në hartimin e politikave që partia pritet t’i prezantojë për zgjedhjet e 28 dhjetorit.
Në paraqitjet publike, Mustafa ka theksuar nevojën për rritje të konkurrueshmërisë, përmirësim të klimës së biznesit dhe politika që e fuqizojnë sektorin privat — tema kyçe për programin ekonomik të PDK-së në këtë garë.
PDK e prezanton Arben Mustafën si një prej figurave më profesionale dhe më të besueshme të listës së saj, duke e vlerësuar si pjesë të ekipit që synon të sjellë standarde të reja në qeverisje pas 28 dhjetorit./Qendra.INFO
