Qendra.info | 11 qershor 2025 – Novi Sad
Dekanija e Fakultetit të Mjekësisë në Novi Sad, Snežana Brkić, është arrestuar sot në mëngjes në një aksion të përbashkët të policisë dhe prokurorisë, së bashku me pesë persona të tjerë. Arrestimi është bërë për shkak të dyshimeve për shpërdorim të pozitës zyrtare.
Sipas informacioneve të siguruara nga Qendra.info, më herët, Prokuroria e Lartë ka iniciuar procedurë penale kundër Brkić dhe disa anëtarëve të komitetit të grevës, me akuzat për pengim të funksionimit të fakultetit dhe organizim të një greve që rezultoi në bllokimin e procesit mësimor. Hetimet janë duke u zhvilluar nga Departamenti Special për Luftimin e Korrupsionit.
Punonjës të Fakultetit të Mjekësisë në Novi Sad e konsiderojnë arrestimin si një akt të pastër presioni politik. Sipas tyre, Brkić është ndëshkuar për faktin se qëndroi në krah të studentëve dhe më pas edhe të stafit akademik, të cilët muaj më parë nisën grevën në shenjë proteste kundër ndërhyrjes në autonominë universitare.
Aktualisht, mbi 50% e stafit të këtij fakulteti ndodhet në grevë prej muajsh, ndërsa mësimi online ende nuk ka rifilluar, pasi shumica e profesorëve kanë refuzuar të rikthehen në mësim pa pasur më parë një marrëveshje me studentët që vijojnë bllokadën.
Në ndërkohë, si pjesë e protestës, mjekë dhe studentë kishin vizatuar sot një vijë të kuqe përpara hyrjes së Qendrës Klinike të Vojvodinës, në kuadër të aksionit “Pacientët nuk janë mjete politike”, i cili është paralajmëruar prej kohësh nga studentët.
