Policia e Kosovës ka arrestuar të premten Igor Popoviqin, ndihmësdrejtor i të ashtuquajturës Zyrë për Kosovën në Qeverinë e Serbisë, pas një fjalimi të mbajtur në fshatin Hoqë e Madhe të Rahovecit, ku ai e cilësoi Ushtrinë Çlirimtare të Kosovës (UÇK) si organizatë terroriste.
Sipas njoftimit zyrtar të Policisë së Kosovës, Popoviq u ndalua në pikën kufitare në Bërnjak dhe u arrestua nën dyshimin për kryerjen e veprës penale “nxitje e përçarjes dhe mosdurimit”.
“Në PKK Bërnjak është arrestuar i dyshuari shtetas i Serbisë për shkak se dyshohet se gjatë një fjalimi në fshatin Hoqë e Madhe ka cilësuar Ushtrinë Çlirimtare të Kosovës si organizatë terroriste, duke i krahasuar veprimet e saj me ngjarje të rënda ndërkombëtare”, thuhet në raportin 24-orësh të Policisë.
Si prova materiale, nga i dyshuari janë sekuestruar përkohësisht dy telefona celularë, ndërsa pas intervistimit me vendim të prokurorit, ai është dërguar në mbajtje.
Deklaratat e Popoviqit kanë shkaktuar reagime të menjëhershme në opinionin publik dhe janë konsideruar si provokim i rëndë në një kohë tensionesh të larta në raportet Kosovë-Serbi. Autoritetet kosovare nuk kanë dhënë ende detaje për masat e mëtejshme, ndërsa rasti pritet të pasohet nga reagime politike dhe diplomatike.
