Policia e Kosovës ka njoftuar sot për arrestimin e një personi të dyshuar për përfshirje në një rast dhunimi në fshatin Radivojc të komunës së Vitisë.
Sipas njoftimit zyrtar, Njësiti i Hetimeve të Përgjithshme nga Sektori i Hetimeve Rajonale në Gjilan, në bashkëpunim të ngushtë me Prokurorinë e Shtetit, ka realizuar arrestimin e të dyshuarit N.S., mashkull kosovar i lindur në vitin 1992.
Arrestimi u bë pas një hetimi intensiv dhe veprimesh të mirëkoordinuara operative, pas krijimit të dyshimeve të bazuara se i dyshuari ishte i përfshirë në veprën penale “Dhunim”, e raportuar më 29 prill 2025.
Me vendim të Prokurorit të Shtetit, i dyshuari është ndaluar në qendrën e mbajtjes për 48 orë, ndërkohë që hetimet për grumbullimin e provave të tjera lidhur me rastin janë duke vazhduar.
Policia ka theksuar se do të vazhdojë me përkushtim për të luftuar dhunën dhe për të sjellë drejtësinë për viktimat e rasteve të tilla.
