Një gotë çaj i nxehtë mund të jetë ngushëllim i përditshëm për shumë njerëz, por nëse shoqërohet mepirje duhani, rreziku për shëndetin mund të bëhet seriozisht alarmues.
Një studim i gjerë i kryer në Kinë ka zbuluar se ky kombinim mund të rrisë deri në pesë herë rrezikun e zhvillimit të kancerit të ezofagut.
Hulumtimi, i publikuar në vitin 2018 nga ekipi i Dr. Canqing Yu në kuadër të Fondacionit Kombëtar të Shkencave Natyrore të Kinës, analizoi të dhënat e 456,155 të rriturve të moshës 30 deri në 79 vjeç, të cilët u ndoqën për një periudhë prej rreth nëntë vitesh.
Ndërsa ndikimi negativ i alkoolit dhe duhanit në shëndetin e ezofagut është i njohur prej kohësh, studimi sjell në vëmendje rolin e mundshëm të temperaturës së çajit në përkeqësimin e këtij rreziku.
Sipas të dhënave, pjesëmarrësit që konsumonin çaj në temperatura shumë të larta dhe njëkohësisht konsumonin më shumë se 15 gramë alkool në ditë, kishin një rrezik pesëfish më të lartë për zhvillimin e kancerit të ezofagut në krahasim me ata që nuk pinin rregullisht çaj të nxehtë dhe kishin një konsum të ulët alkooli.
Duhanpirësit, nga ana tjetër, të cilët konsumonin çaj të nxehtë çdo ditë, e dyfishonin rrezikun e tyre krahasuar me individët që nuk i kishin këto zakone.
Studiuesit theksojnë se vetë pirja e çajit të nxehtë nuk ishte e lidhur ndjeshëm me rritjen e rrezikut, përveç kur shoqërohej me faktorë të tjerë të dëmshëm si alkooli dhe duhani.
Teoria është se ‘dëmi termik’ i shkaktuar nga pijet shumë të nxehta mund të irritojë ezofagun dhe të bëjë indet më të ndjeshme ndaj efekteve kancerogjene të substancave të tjera.
