Prishtinë – Zëvendëskryeministri i parë në detyrë për Integrim Evropian, Zhvillim dhe Dialog, Besnik Bislimi, zhvilloi sot një takim me ministren për Evropë, Integrim dhe Familje të Austrisë, Claudia Plakolm, dhe sekretaren e shtetit për Çështje Evropiane të Sllovenisë, Neva Grašič.
Në fokus të bisedimeve ishin procesi i integrimit evropian të Kosovës, zhvillimi ekonomik, dialogu me Serbinë dhe situata e sigurisë në rajon. Palët theksuan rëndësinë e bashkëpunimit të ngushtë rajonal dhe përkrahjen e vazhdueshme të Austrisë dhe Sllovenisë në rrugën e Kosovës drejt Bashkimit Evropian.
Zëvendëskryeministri Bislimi falënderoi dy vendet partnere për mbështetjen e tyre të qëndrueshme dhe përmendi arritjet e Kosovës në katër vitet e fundit, duke përfshirë rritjen më të lartë ekonomike në rajon, uljen e papunësisë nga 23.8% në 10.9%, dhe përmirësimet në politikat sociale për nënat, fëmijët, pensionet dhe pagën minimale.
Ai shtoi se këto rezultate, së bashku me liberalizimin e vizave dhe aplikimin për anëtarësim në BE, dëshmojnë se Kosova është e gatshme për marrjen e statusit të vendit kandidat.
Në fund të takimit u diskutua edhe për Planin e Rritjes për Ballkanin Perëndimor, Procesin e Berlinit, zgjerimin e BE-së dhe nevojën për heqjen e masave të Bashkimit Evropian ndaj Kosovës.
