Një zhvillim i veçantë ka ndodhur në Dhomat e Specializuara në Hagë, në kohën kur po vazhdon dëshmia e ish-emisarit amerikan për Kosovën, Chris Hill. Me kërkesë të Zyrës së Prokurorit të Specializuar dhe me aprovimin e gjyqtarit të procedurës paraprake, është urdhëruar që të kontrollohen të gjitha kompjuterët dhe printerët që ish-presidenti Hashim Thaçi ka pasur në dispozicion brenda qendrës së paraburgimit.
Sipas një dokumenti të publikuar nga gjyqtarja e procedurës paraprake, Marjorie Masselot, më 8 shtator 2025 është autorizuar një kompani e jashtme forenzike për të kryer analizë të thelluar mbi pajisjet elektronike që pretendohet se janë përdorur nga Thaçi
“Gjykatësi i Procedurës Paraprake autorizoi kryerjen e kontrolleve shtesë forenzike mbi materialet e ruajtura nga printerët dhe kompjuterët që janë përdorur ose kanë qenë të qasshme për Hashim Thaçin në Qendrat e Paraburgimit të Dhomave të Specializuara”, thuhet në dokument.
Të gjitha dokumentet, skedarët dhe printimet që kanë dalë nga pajisjet e përdorura prej ish-presidentit janë tërhequr, kopjuar dhe analizuar përpara se t’i dorëzohen Prokurorisë.
Kontrolli ka ndodhur gjatë muajit shtator dhe mbrojtja e Thaçit ka qenë e informuar për procesin. Ky veprim vjen pas një serie masash të ndërmarra nga gjykata në lidhje me akuzat për ndërhyrje në drejtësi, ku më herët Thaçit iu kufizuan vizitat e mbi 10 personave të afërt.
Prokuroria fillimisht kishte kërkuar që kufizimi të zgjerohej edhe ndaj vëllezërve të tij, mirëpo pas reagimeve publike, ky hap nuk u miratua.
Procesi i kontrollit të pajisjeve konsiderohet një ndër ndërhyrjet më të thella teknike në këtë fazë të gjykimit dhe pritet të jetë pjesë e provave të mëtejshme në dosjen e Prokurorisë.
