Prishtinë, 17 Korrik 2025
Policia e Kosovës ka njoftuar për arrestimin e pesë personave gjatë bastisjeve të zhvilluara dje në ambientet e Agjencisë Kadastrale dhe Agjencisë së Arkivave, si dhe në tri qytete: Prishtinë, Suharekë dhe Ferizaj.
Sipas raportit zyrtar, në kuadër të operacionit hetimor të zhvilluar në periudhën 2022–2024, janë arrestuar tre burra dhe dy gra me shtetësi kosovare, të dyshuar për veprën penale “Keqpërdorim i pozitës apo autoritetit zyrtar”.
Gjatë bastisjeve janë sekuestruar dy kompjuterë, pesë telefona mobilë, një USB dhe dokumente të ndryshme që lidhen me rastin.
Me urdhër të prokurorit kompetent, të dyshuarit janë dërguar në mbajtje për procedura të mëtejme hetimore.
Hetimet janë duke u zhvilluar në koordinim me Prokurorinë përkatëse dhe pritet që autoritetet të ofrojnë më shumë detaje në ditët në vijim.
