Bashkimi Evropian ka përshëndetur zhvillimin e rundit të dytë të zgjedhjeve lokale në Kosovë, duke i cilësuar ato si rregullt dhe gjithëpërfshirëse. Një zëdhënës i BE-së ka bërë thirrje që rezultatet e zgjedhjeve të zbatohen pa vonesa.
“Ne mirëpresim zhvillimin e rregullt dhe inkluziv të balotazhit të zgjedhjeve të dielën. Ne bëjmë thirrje për implementim të shpejtë të rezultateve,” është thënë nga zëdhënësi i BE-së.
Burime brenda BE-së përmendin se zgjedhjet lokale, sidomos në komunat me shumicë serbe në veri, kanë rëndësi për uljen e tensioneve dhe rikthimin e serbëve në institucionet e Kosovës. BE e ka vlerësuar pjesëmarrjen e tyre si hap të parë drejt normalizimit, pas largimit nga institucionet tri vite më parë.
Sipas të njëjtave burime, zbatimi i rregullt i rezultateve të zgjedhjeve mund të çojë në heqjen e masave ndëshkuese të BE-së ndaj Kosovës. Për këtë, kërkohet transferim i shpejtë dhe korrekt i pushtetit lokal tek kandidatët fitues në të gjitha komunat.
Po ashtu, BE ka përsëritur se mungesa e një qeverie me mandat të plotë në Kosovë po e ngadalëson rrugën e saj drejt integrimit dhe po e pengon në përfitimin e fondeve nga Plani i Rritjes Evropiane.
