Tiranë, 26 Gusht 2025 – Biznesmeni i njohur dhe ish-presidenti i Kosovës, Behgjet Pacolli, është parë sot duke dalë nga ambientet e Kryeministrisë në Tiranë, duke ngritur interesimin mbi arsyen e kësaj vizite të papritur.
Edhe pse nuk ka ende një njoftim zyrtar nga qeveria shqiptare, burime pranë Kryeministrisë bëjnë të ditur për Qendra.info se Pacolli është takuar me Kryeministrin Edi Rama. Takimi, sipas këtyre burimeve, është zhvilluar me dyer të mbyllura dhe ka zgjatur rreth një orë.
Vizita e Pacollit në Tiranë ndodh në një kohë kur në qarqet politike dhe ekonomike po zhvillohen diskutime rreth projekteve të reja rajonale, të cilat mund të përfshijnë investime të rëndësishme në infrastrukturë, turizëm dhe energji.
Behgjet Pacolli, i njohur për aktivitetin e tij të gjerë biznesor në rajon dhe për angazhimin politik në Kosovë, ka qenë shpeshherë i përfshirë në projekte me karakter ndërkufitar që synojnë forcimin e bashkëpunimit mes Shqipërisë dhe Kosovës.
Ende mbetet për t’u parë nëse kjo vizitë do të shoqërohet me ndonjë deklaratë publike apo marrëveshje konkrete në ditët në vijim.
