Ish-deputeti i Kuvendit të Kosovës, Zafir Berisha, ka reaguar pas vendimit të fundit të Gjykatës Speciale në Hagë, e cila rrëzoi mocionin e mbrojtjes për lirimin e përkohshëm të ish-krerëve të UÇK-së, përfshirë ish-presidentin Hashim Thaçi.
Në një postim në Facebook, Berisha kritikoi ashpër gjykatën, duke e cilësuar vendimin si të njëanshëm dhe të motivuar politikisht. Sipas tij, kjo tregon për “qëllimin djallëzor” të institucionit dhe për përpjekjet për ta realizuar planin e Serbisë për zhbërjen e shtetit të Kosovës.
“Mënyra se si Gjykata Speciale rrëzoi mocionin e mbrojtjes së krerëve të UÇK-së, është e mjaftueshme për të kuptuar qëllimin e saj të vërtetë. Kjo gjykatë po ecën drejt realizimit të synimeve të Serbisë, të argatëve të saj në Kosovë dhe të atyre që e sponsorizuan këtë gjykatë,” shkroi Berisha.
Ai kritikoi gjithashtu Shqipërinë për, siç tha ai, mungesën e angazhimit konkret në skenën ndërkombëtare për të kundërshtuar këtë gjykatë dhe për të mbrojtur luftën çlirimtare të UÇK-së.
“Edhe atje, retorika patriotike ka qenë vetëm fjalë boshe,” shtoi ai.
Berisha theksoi se dënimi eventual i Hashim Thaçit dhe bashkëluftëtarëve të tij do të përbënte pikënisjen e zhbërjes së shtetit të Kosovës, duke akuzuar qeverinë aktuale për bashkëpunim me interesat serbe.
“Në Kosovë kemi një regjim me mbetje sllave, të cilët kanë bashkëpunuar me Serbinë dhe këtë gjykatë, duke siguruar dosje të falsifikuara dhe dëshmitarë të rremë,” përfundoi ai.
