Kosovë – Në kuadër të zhvillimeve të fundit ndërmjet Shteteve të Bashkuara të Amerikës dhe Federatës Ruse, vërehen lëvizje të shtuar të mjeteve ajrore ushtarake amerikane mbi territorin e Kosovës.
Pamjet e siguruara nga platforma e monitorimit të fluturimeve Flightradar24 tregojnë një helikopter ushtarak të tipit Sikorsky UH-60M Black Hawk, i regjistruar me numrin 12-20525, duke kryer patrullime në hapësirën ajrore mbi Prishtinë, Ferizaj, Gjakovë dhe zonat kufitare me Shqipërinë, Maqedoninë e Veriut dhe Malin e Zi.
Helikopteri, pjesë e forcave të ushtrisë amerikane, ka fluturuar në një lartësi prej rreth 1,675 këmbësh dhe me shpejtësi prej 41 nyjesh, duke ndjekur një trajektore që mbulon zona strategjike dhe kufitare. Lëvizje të tilla përputhen me misionet e rregullta të sigurisë dhe vëzhgimit që kryhen nga forcat e KFOR-it, ku SHBA ka një prani të rëndësishme.
Këto patrullime vijnë në një periudhë kur situata gjeopolitike është e tensionuar, dhe Shtetet e Bashkuara po demonstrojnë angazhimin e tyre për sigurinë e rajonit dhe stabilitetin në Ballkanin Perëndimor.
