Kryesuesi i Komisionit Qendror të Zgjedhjeve (KQZ), Kreshnik Radoniqi, ka ftuar përmes një videomesazhi të gjithë shtetasit e Kosovës që jetojnë jashtë vendit të regjistrohen për të votuar me postë në zgjedhjet lokale të 12 tetorit.
Sipas KQZ-së, procesi i regjistrimit për votuesit jashtë Kosovës ka nisur më 23 korrik dhe do të vazhdojë deri më 29 gusht. Regjistrimi mund të bëhet vetëm përmes platformës zyrtare të KQZ-së.
“Për të votuar nga jashtë Kosovës, është e domosdoshme të regjistroheni brenda këtij afati,” u tha në mesazhin e Radoniqit.
Ai theksoi rëndësinë e pjesëmarrjes së mërgatës në procesin demokratik, duke u drejtuar qytetarëve:
“Pjesëmarrja juaj në zgjedhje është e rëndësishme dhe vota juaj ndikon drejtpërdrejtë në të ardhmen e komunës tuaj.”
Sipas rregulloreve të KQZ-së, vetëm personat që regjistrohen brenda periudhës së përcaktuar do të kenë të drejtë të votojnë me postë, nga 17 shtatori deri më 11 tetor 2025.
Ndryshe nga zgjedhjet parlamentare, votimi jashtë vendit për zgjedhjet lokale bëhet ekskluzivisht përmes postës, pasi Ligji për Zgjedhjet e Përgjithshme nuk parasheh votim në përfaqësi diplomatike për këtë lloj zgjedhjesh.
Për më shumë informacion dhe për t’u regjistruar, qytetarët mund të vizitojnë faqen zyrtare të KQZ-së.
Njoftimi i plotë:
