Daut Haradinaj, anëtar i Aleancës për Ardhmërinë e Kosovës (AAK), ka reaguar ashpër pas thirrjeve përjashtuese dhe antishqiptare të dëgjuara gjatë ndeshjes së basketbollit ndërmjet Maqedonisë së Veriut dhe Rumanisë. Ai ka shprehur indinjatë për heshtjen e kryeministrit në detyrë të Kosovës, Albin Kurti, të cilin e quan “kumbarë të koalicionit qeverisës në Maqedoninë e Veriut”.
Haradinaj ka denoncuar slogane të rënda të dëgjuara gjatë ndeshjes, si:
- “Dhoma gazi për shqiptarët”,
- “Shqiptari i mirë është vetëm shqiptari i vdekur”,
- “Maqedoni e pastër (pa shqiptarë)”,
- dhe “Shqiptarët e mallkuar ta dijnë se emri Maqedoni nuk zhduket”.
Sipas Haradinajt, këto thirrje përbëjnë një alarm të rëndë për gjendjen e shqiptarëve në Maqedoninë e Veriut, por pavarësisht kësaj, Kurti nuk ka reaguar aspak.
“Asnjë fjalë, asnjë reagim nga Kurti, kumbara i koalicionit qeverisës në Maqedoni të Veriut,” ka shkruar Haradinaj në një postim publik.
Ky reagim vjen në një kohë kur tensionet ndëretnike në rajon kërkojnë përgjegjësi të shtuar nga liderët politikë shqiptarë në rajon.
