Deputetja e Parlamentit të Ukrainës, Ivanna Klympush Tsintsadze, ka deklaruar në një intervistë për Klan News se Ukraina pritet të njohë Kosovën në të ardhmen e afërt. Sipas saj, kjo çështje nuk do të mbetet më pezull dhe vendimi për njohjen formale është afër.
“Unë besoj se në të ardhmen e afërt Ukraina do ta njohë Kosovën. Nuk do të jetë më një çështje e hapur. Besoj se Ukraina do ta marrë vendimin e duhur që pritet nga populli në Kosovë,” – u shpreh deputetja ukrainase.
Ajo theksoi gjithashtu mirënjohjen ndaj Shqipërisë për mbështetjen e vazhdueshme ndaj Ukrainës në kohë lufte, duke e cilësuar atë si një vend që është “në anën e duhur të historisë”.
“Jam shumë mirënjohëse për ndihmën që kanë dhënë qytetarët e Shqipërisë. Ata janë në anën e duhur të historisë. Ne kemi ndërtuar një koordinim të ngushtë me shtetin shqiptar, në aspektin politik, ushtarak dhe humanitar,” – tha Klympush Tsintsadze.
Deputetja ukrainase nënvizoi edhe marrëveshjet për siguri mes Ukrainës dhe Shqipërisë, duke shprehur besimin se kjo bashkëpunim do të zgjerohet edhe më tej.
“Kemi arritur disa marrëveshje me Shqipërinë për çështjet e sigurisë në vitet e ardhshme. Shpresojmë që mbështetja të vazhdojë në rrugëtimin tonë drejt NATO-s dhe BE-së. Së bashku do të arrijmë objektivat strategjike,” – përfundoi ajo.
Nëse Ukraina e zyrtarizon këtë vendim, ajo do të bëhej një nga vendet e fundit evropiane që ndryshon qëndrimin tradicional ndaj statusit të Kosovës, duke pasur ndikim të rëndësishëm diplomatik në arenën ndërkombëtare.
