Pas muajve të tensioneve dhe tarifave të larta, presidenti amerikan Donald Trump ka zbutur tonet ndaj Kinës, shkruan Deutsche Welle. Ai ka shtyrë afatet për tarifa, ka kufizuar taksat doganore për mallrat kineze në 30% (ndërsa për Indi e Brazilin deri në 50%), dhe ka propozuar një samit SHBA–Kinë në vjeshtë.
Sipas analistëve, Trump ka disa arsye për këtë qasje:
SHBA dëshiron të shmangë rritjen e çmimeve para sezonit të festave, kur tregtarët varen nga importet kineze.
Po përgatitet terreni për një marrëveshje më të gjerë tregtare që do të përfshijë teknologjinë, energjinë dhe mineralet e rralla.
Kina ka treguar rezistencë më të fortë se çdo vend tjetër ndaj presionit amerikan, duke kufizuar eksportet e mineraleve strategjike që janë jetike për industrinë amerikane.
Eksperti Antonio Fatas nga shkolla e biznesit INSEAD thotë se Pekini e ka detyruar Trumpin të kërkojë “poluga të reja fuqie”, pasi një luftë e plotë tregtare do të kishte pasoja të rënda ekonomike për SHBA.
Ndërkohë, Trump kërkon që Kina të katërfishojë blerjen e sojës amerikane për të ndihmuar fermerët dhe për të ulur deficitin tregtar prej 295,5 miliardë dollarësh.
Pekini nga ana e tij synon:
heqje më të qëndrueshme të tarifave amerikane,
mbrojtje për kompanitë kineze ndaj sanksioneve,
dhe garanci për akses në teknologjinë më të avancuar, përfshirë çipat e inteligjencës artificiale.
Sipas DW, përplasja SHBA–Kinë nuk ka përfunduar – por zbutja e tonit tregon se të dy palët po kërkojnë kompromis për të shmangur një spirale të re tarifash. Qendra.INFO
