Një vrasje në tentativë ka ndodhur sot në qytetin e Pejës, ku si pasojë e të shtënave me armë zjarri, një person ka mbetur i plagosur.
Burime të Qendra.info bëjnë të ditur ekskluzivisht se i dyshuari kryesor për këtë rast është Brendon Ajazaj.
Sipas informatave, Ajazaj dyshohet se ka plagosur Uliks Ferizin, i cili pas incidentit ka marrë trajtim mjekësor dhe ndodhet nën kujdesin e mjekëve.
I dyshuari është emër i njohur për organet e rendit, pasi më 1 nëntor të këtij viti ishte arrestuar në Prishtinë për posedim të armës dhe ishte dërguar në mbajtje për 48 orë.
Lajmin për gjuajtjen me armë e ka konfirmuar për Qendra.info edhe zëdhënësi i Prokurorisë Themelore në Pejë, Shkodran Nikçi, i cili ka bërë të ditur se i dyshuari është larguar nga vendi i ngjarjes.
“Një person është plagosur nga arma e zjarrit, ndërsa personi i dyshuar është larguar nga vendi i ngjarjes”, ka deklaruar Nikçi.
Sipas tij, njësitet e Policisë së Kosovës kanë dalë menjëherë në vendin e ngjarjes dhe kanë nisur hetimet intensive për zbardhjen e plotë të rastit dhe kapjen e të dyshuarit.
Qendra.info do t’ju mbajë të informuar me zhvillimet dhe detajet e reja sapo ato të konfirmohen nga autoritetet kompetente.
