Tiranë, 26 Gusht 2025 – Qendra.info
Burime të sigurta për Qendra.info bëjnë me dije se biznesmeni dhe ish-presidenti i Kosovës, Behgjet Pacolli, është shumë pranë përfshirjes në projektin e ri qeverisës të Kryeministrit Edi Rama, i njohur tashmë si “Rama 4”.
Pacolli është parë sot në ambientet e Kryeministrisë në Tiranë, ku sipas të njëjtave burime, ai ka zhvilluar një takim të gjatë dhe të mbyllur me kryeministrin Rama. Detajet zyrtare të takimit nuk janë bërë publike, por lëvizjet e fundit në skenën politike dhe ekonomike nxisin spekulime të forta për një rol aktiv të Pacollit në qeverinë e re shqiptare.
Burime brenda kabinetit qeveritar nuk përjashtojnë mundësinë që Pacolli të marrë një rol këshillues strategjik në fushën e ekonomisë dhe investimeve, me fokus në projekte rajonale dhe bashkëpunim ndërkombëtar.
Përfshirja e një figure si Pacolli, me përvojë të gjatë në biznes dhe diplomaci, shihet si një sinjal i fortë për ambiciet e qeverisë “Rama 4” në tërheqjen e investimeve të mëdha dhe forcimin e lidhjeve mes Shqipërisë dhe Kosovës.
As Kryeministria e Shqipërisë dhe as vetë Pacolli nuk kanë dhënë ende një deklaratë zyrtare.
