Një ëmbëlsues artificial i pranishëm në pije dietike, produkte të pjekura, produkte qumështi dhe çamçakëz – sukraloza – mund të ulë ndjeshëm efektivitetin e trajtimeve imunoterapike te pacientët me kancer, kanë zbuluar dy studime të reja.
Hulumtimet e kryera nga Universiteti i Pitsburgut kanë treguar se sukraloza ndikon negativisht në mikrobiomën e zorrëve, duke ulur nivelin e një aminoacidi thelbësor – arginina, që është i domosdoshëm për funksionimin e qelizave T, të cilat janë përgjegjëse për luftimin e sëmundjeve si kanceri.
Në një studim paraklinik te minjtë, të cilët ishin trajtuar për adenokarcinomë ose melanomë, u vërejt se minjtë që konsumonin sukralozë dhe merrnin terapi anti-PD1 kishin tumore më të mëdha dhe mbijetesë më të ulët krahasuar me ata që nuk ishin ekspozuar ndaj ëmbëlsuesit.
Në një studim klinik me 132 pacientë me melanomë të avancuar ose kancer të mushkërive, të cilët trajtoheshin me imunoterapi (me ose pa kimioterapi), efektiviteti i trajtimit gjithashtu rezultoi më i ulët në rastet me konsum të sukralozës.
“Zbuluam se sukraloza pengoi efektivitetin e imunoterapisë në një gamë të gjerë trajtimesh dhe llojesh kanceri”, deklaroi Dr. Diwakar Davar, studiues kryesor në Universitetin e Pitsburgut.
Megjithatë, studiuesit kanë identifikuar një zgjidhje të mundshme: kur minjve iu dhanë suplement arginine ose citrulline, reagimi ndaj imunoterapisë u kthye në nivele normale.
Dr. Abby Overacre, bashkautore e studimit, theksoi rëndësinë e kësaj zbulese për pacientët: “Këta pacientë tashmë përballen me sfida të mëdha, ndaj t’u kërkohet të ndryshojnë rrënjësisht dietën nuk është realiste.”
Një provë klinike më e gjerë është planifikuar për të vlerësuar nëse suplementet e citrulinës mund të zbusin efektet negative të sukralozës gjatë trajtimit të kancerit.
