Enver Hasani, ish-kryetari i Gjykatës Kushtetuese të Kosovës, ka reaguar ndaj akuzave të bëra nga Kadri Kryeziu, ish-nënkryetar i të njëjtit institucion. Kryeziu e ka akuzuar Hasanin për “deformim të Kushtetutës”, duke përmendur konkretisht dy aktgjykimet e vitit 2011 dhe 2014 – rastet e Behgjet Pacollit dhe Isa Mustafës – si vendime problematike që sipas tij kanë ndikuar negativisht në rendin kushtetues të vendit.
Gjithashtu, Kryeziu ka kritikuar Hasanin për, siç i quan ai, “shpikje rregullash”, përfshirë vendosjen e kuorumit prej 80 deputetësh për zgjedhjen e presidentit. Ai ka shkuar edhe më tej, duke e akuzuar Hasanin për ambicie personale për të marrë postin e presidentit të vendit nëpërmjet, siç shprehet ai, “një grushti institucional”.
Përballë këtyre akuzave, Hasani ka zgjedhur një qasje ironike. Në një përgjigje për Gazeta Express, ai ka deklaruar:
“Do t’i përgjigjem zotit Kryeziu vetëm me një kusht: nëse është në gjendje ta riprodhojë me gojë, live në ndonjë emision televiziv, krejt këtë shkrim që ka postuar sot!”
Kjo deklaratë përforcon përplasjen publike ndërmjet dy figurave të njohura të sistemit kushtetues në Kosovë, duke e zhvendosur debatin nga niveli juridik në atë personal e mediatik.
