Presidenti turk Recep Tayyip Erdogan ka deklaruar se Turqia është e gatshme të ndërmjetësojë sërish midis Rusisë dhe Ukrainës, duke shprehur shpresën se raundet e ardhshme të bisedimeve të paqes do të zhvillohen në territorin turk.
“Siç u ulën palët në tryezë në Stamboll, do të ulen përsëri në një të ardhme të afërt – dhe kjo luftë përgjakshme do të marrë fund,” u shpreh Erdogan të hënën, pas mbledhjes së kabinetit të tij në Ankara.
Këto komente vijnë pas raundit të tretë të bisedimeve joformale që u mbajt në Stamboll më 23 korrik, pas takimeve paraprake në maj dhe qershor. Edhe pse mbahen kryesisht jashtë vëmendjes mediatike, bisedimet kanë përfshirë si diplomaci zyrtare, ashtu edhe komunikime të fshehta mes këshilltarëve të sigurisë nga të dyja palët, me mbështetjen logjistike dhe politike të Ankarasë.
Turqia ka pasur një rol të rëndësishëm në fazat e hershme të dialogut, duke pritur takimet e nivelit të lartë mes delegacioneve ruse dhe ukrainase në mars të vitit 2022. Ato negociata, ndonëse përfundimisht dështuan, ndihmuan në arritjen e marrëveshjeve si Iniciativa për Drithërat në Detin e Zi – e ndërmjetësuar nga Turqia dhe OKB.
Presidenti Erdogan ka theksuar vazhdimisht rëndësinë e diplomacisë mbi përshkallëzimin ushtarak dhe e ka pozicionuar Turqinë si një aktor neutral, duke ruajtur lidhje me të dyja palët në konflikt.
Zyrtarët turq e kanë vlerësuar raundin e fundit të bisedimeve si “konstruktiv”, ndërsa Ankaraja mbetet e përkushtuar për të krijuar kushte për një marrëveshje të mundshme armëpushimi, në një kohë kur lufta është futur në ngërç të gjatë dhe mbështetja ndërkombëtare po shfaq shenja lodhjeje.
