23 tetor 2025 | Tiranë — Ish-drejtori i Shërbimit Informativ të Shqipërisë, Fatos Klosi, ka hedhur një deklaratë të fortë për kryeministrin e Kosovës, Albin Kurti, duke thënë se ky i fundit nuk iu bashkua UÇK-së gjatë luftës, me arsyetimin se nuk ishte mirë me shëndet dhe s’e përballonte jetën e malit.
Në një intervistë për Top News, Klosi u shpreh se Kurti ka një “armiqësi të hapur me historinë e UÇK-së”, pasi vetë nuk ka qenë pjesë e saj.
“Kurti është në armiqësi të hapur me historinë e UÇK-së, sepse nuk mori pjesë në atë histori. Ai ka qenë në fillim bashkë me Demaçin, si asistent i tij, por pas Rambujesë nuk ra dakord me mënyrën si u trajtua situata dhe u largua”, – tha Klosi.
Sipas ish-kreut të SHISH-it, UÇK-ja e kishte ftuar Kurtin që të dilte në mal, por ai kishte refuzuar, duke dhënë si arsye problemet shëndetësore.
“Ju lutën që ta ndihmonin nëse donte të merrte pjesë e të dilte në mal. Por ai tha: ‘Nuk jam mirë me shëndet, nuk e përballoj jetën e malit’, dhe u tërhoq”, – rrëfeu Klosi.
Klosi shtoi se Kurti e ka ndjerë gjithmonë mungesën e pjesëmarrjes në luftë, duke e konsideruar këtë si një arsye pse ka një raport të tensionuar me trashëgiminë e UÇK-së.
“Që atëherë, sigurisht e ka ndjerë veten të mangët pse nuk mori pjesë. Ai nuk mori pjesë në çlirimin e Kosovës, që ishte fenomeni më i madh në historinë e kombit shqiptar”, – përfundoi Klosi./Qendra.INFO
