Federata e Futbollit të Serbisë ka reaguar pas ndeshjes së së shtunës, ku Kombëtarja shqiptare barazoi 0-0 me Serbinë në “Arenën Kombëtare” të Tiranës, për kualifikueset e Kupës së Botës 2026. Në një deklaratë të shpërndarë për mediat, Federata Serbe falënderoi FSHF-në dhe presidentin Armand Duka për mikpritjen, por theksoi se sjellja e disa tifozëve shqiptarë ishte e papranueshme dhe e dënueshme.
Deklarata e Plotë e Federatës Serbe:
“Përpara të vërtetës së shëmtuar me të cilën u përballën lojtarët tanë në fushë, dëshirojmë të theksojmë faktin se e gjithë ekspedita e Federatës së Futbollit të Serbisë, që nga minuta e parë deri në minutën e fundit të qëndrimit të tyre në kryeqytetin shqiptar, u pritën jashtëzakonisht mirë nga Federata e Futbollit të Shqipërisë dhe presidenti i saj, Armand Duka. Që nga pritja në aeroport deri në nisjen nga Tirana, u treguat respekt për ne. Fatkeqësisht, skena nga tribunat që bota e futbollit nuk do të donte t’i shihte, skena që UEFA i ka luftuar prej vitesh përmes organeve dhe rregulloreve të saj, kanë hedhur një njollë të madhe në lidhje me sjelljet e tifozëve. Shoqata e Futbollit e Serbisë dënon fuqimisht shpërthimet politike të urrejtjes përmes formave të ndryshme të provokimeve dhe thirrjeve ndaj organizatave terroriste. Kur fjalët nuk mjaftonin, lojtarët tanë të futbollit u kërcënuan edhe fizikisht. Monedha, gota dhe shishe fluturuan nga tribunat, gjyqtari italian ndërpreu ndeshjen në disa raste dhe spiker-i zyrtar bëri gjithashtu njoftimin e tij, por të gjitha pa rezultate.”**
Federata Serbe gjithashtu sqaroi se trajneri Dragan Stojkovi kishte vlerësuar atmosferën në stadium në kontekstin e atmosferës sportive, tribunave të plota dhe mbështetjes për ekipin kombëtar, por theksoi se nuk kishte regjistruar plotësisht të gjitha mesazhet skandaloze dhe ofenduese që erdhën nga tribunat, të cilat më vonë u regjistruan dhe u komentuan në media.
Në fund, Federata Serbe dënoi qartë dhe pa mëdyshje çdo brohoritje që fyen popullin serb dhe ekipin kombëtar serb, apo këdo tjetër, duke theksuar se fenomene të tilla nuk kanë vend në fushat sportive.
Ky reagim i Federatës Serbe vjen pas një periudhe të tensionuar mes dy kombëtareve, ku më herët, në vitin 2024, Federata Serbe kishte kërcënuar se do të tërhiqej nga garat ndërkombëtare nëse UEFA nuk dënonte Shqipërinë dhe Kroacinë për sjelljet e tifozëve të tyre gjatë ndeshjeve mes këtyre ekipeve
