Në kohën kur presidenti i Shteteve të Bashkuara, Donald Trump, nisi fjalimin e tij në Forumin Ekonomik Botëror në Davos, Zvicër, një numër liderësh evropianë, përfshirë presidentin e Francës, Emmanuel Macron, dhe presidenten e Komisionit Evropian, Ursula von der Leyen, janë larguar nga ngjarja në shenjë proteste, raporton Paparaci.
Trump mbërriti në Davos rreth orës 14:00 dhe rreth 30 minuta më vonë nisi fjalimin e tij para pjesëmarrësve të forumit. Menjëherë pas fillimit të fjalimit, disa udhëheqës ndërkombëtarë janë larguar nga sallat ku po zhvillohej aktiviteti, në një akt që perceptohet si reagim ndaj politikave dhe retorikave të presidentit amerikan.
Largimi i liderëve si Macron dhe von der Leyen vjen në një kohë të tensionuar në marrëdhëniet transatlantike, përfshirë mosmarrëveshjet për çështje strategjike si propozimet për tarifa mbi importet evropiane dhe propozimi i Trumpit për përfshirje më të madhe të SHBA-së në çështje si Grenlanda, të cilat lidhen me interesat e sigurisë dhe ekonomisë globale.
Ndërsa Trump vazhdon fjalimin e tij, temat kryesore përfshijnë ekonominë globale, marrëdhëniet tregtare dhe rëndësinë strategjike të rolit amerikan në skenën ndërkombëtare./Qender.Info
