Hagë – Një akt simbolik dhe me domethënie të thellë është shënuar sot në Hagë, ku flamuri i Ushtrisë Çlirimtare të Kosovës (UÇK) është shpalosur pranë ndërtesës së Gjykatës Speciale, në shenjë mbështetjeje për protestën e paralajmëruar që do të mbahet në Prishtinë kundër padrejtësive ndaj ish-krerëve të UÇK-së.
Shpalosja e flamurit në zemër të Hagës ka për qëllim të dërgojë një mesazh të qartë ndërkombëtar për padurimin dhe kundërshtimin e shqiptarëve ndaj proceseve gjyqësore që, sipas shumë qytetarëve dhe organizatave, po zhvillohen në mënyrë të njëanshme dhe politike.
Ky veprim vjen pak orë para protestës së madhe që do të mbahet sot në sheshin “Skënderbeu” në Prishtinë, organizuar nga organizatat e dala nga lufta e UÇK-së dhe e mbështetur nga figura të shumta publike në Kosovë dhe në diasporë.
Flamuri i UÇK-së para Gjykatës në Hagë është komentuar në rrjete sociale si një kujtesë historike e sakrificës për liri dhe pavarësi, por edhe si një refuzim i tentativave për ta barazuar luftën çlirimtare me krimet e Serbisë.
