Një foshnje 9 muajshe ka ndërruar jetë tragjikisht pasi dyshohet se është ngulfatur nga lidhësja e djepit, teksa ndodhej në gjumë në shtëpinë e saj në fshatin Gjinoc të Komunës së Suharekës.
Rasti fillimisht është raportuar në Emergjencën e Spitalit Rajonal të Prizrenit, ku foshnja u dërgua për trajtim mjekësor. Për shkak të gjendjes së rënduar, ajo është transferuar më pas në Qendrën Klinike Universitare të Kosovës (QKUK) në Prishtinë.
Megjithatë, më 11 korrik 2025, Policia e Kosovës ka konfirmuar se foshnja nuk ka arritur të mbijetojë dhe ka ndërruar jetë.
Zëdhënësi i Policisë së Prizrenit, Shaqir Bytyqi, ka deklaruar se lidhur me rastin është njoftuar Prokurori i Shtetit, i cili ka urdhëruar që trupi i pajetë të dërgohet në Institutin e Mjekësisë Ligjore për autopsi.
Hetimet për këtë ngjarje të rëndë janë duke vazhduar.
