Sekretarja e Përgjithshme e Partisë Demokratike të Kosovës, Vlora Çitaku, ka reaguar pas vendimit të kryeministrit në detyrë, Albin Kurti, për ndarjen e nga 100 eurove për studentët, vetëm pak ditë para balotazhit të 9 nëntorit.
Çitaku e cilësoi këtë veprim si përdorim elektoral të parave publike.
“Ja si duket abuzimi me taksat e qytetarëve të Republikës së Kosovës për nevoja elektorale të Kryetarit të LVV. Vetëm tre ditë para zgjedhjeve, me paratë e qytetarëve të varfëruar, të cilëve ua ka shtrenjtuar rrymën për t’i shërbyer mafias energjetike, ai shpërndan nga 100 euro për studentët,” ka shkruar ajo.
Tutje, Çitaku tha se kjo nuk paraqet përkrahje sociale, por një veprim të motivuar nga interesi politik.
“Ky nuk është as kujdes social, as mbështetje për rininë. Është mashtrim. Është manipulim. Është papërgjegjësi. Dhe mbi të gjitha, është panik,” përfundoi ajo.
