Zyrtari i Partisë Demokratike të Kosovës (PDK), Arbën Gecaj, ka reaguar ndaj deklaratës së deputetit të Lidhjes Demokratike të Kosovës (LDK), Besian Mustafa, i cili tha se LDK-ja kishte bërë “gabim trashanik” kur e kishte votuar Hashim Thaçin për president.
Gecaj ka përdorur tone ironike ndaj qëndrimit të Mustafës dhe drejtimit aktual të LDK-së, duke aluduar se lidershipi i kësaj partie po e dëmton atë politikisht.
Sipas tij, kryetari i LDK-së, Lumir Abdixhiku, dhe një brez i ri brenda partisë kanë aftësi për t’i minimizuar partitë e mëdha.
“E ka një brez LDK-ja, me Lumirin në krye, që po të hynin në VV, prej gjysmë milioni votave që i kanë, do ta binin partinë në 10 për qind”, ka shkruar Gecaj.
Deklarata e tij vjen në vazhdën e përplasjeve verbale mes përfaqësuesve të PDK-së dhe LDK-së lidhur me vendimet politike të së kaluarës dhe pozicionimet aktuale në skenën politike.
