Gjykata Kushtetuese u ka bërë thirrje deputetëve të Kuvendit të Kosovës që të përmbushin detyrimet e tyre në përputhje me Ligjet dhe Kushtetutën e Republikës së Kosovës.
Në aktvendimin e plotë të publikuar sot, Gjykata thekson se çdo pengesë apo mungesë bashkëpunimi në zbatimin e detyrimeve dhe autorizimeve kushtetuese bie ndesh me frymën e Kushtetutës.
“Gjykata përsërit se, përderisa funksionimi demokratik i institucioneve shtetërore është përgjegjësi parësore e secilit person të cilit i janë dhënë autorizime publike, të gjitha veprimet e ndërmarra nga personat që ushtrojnë fuqi apo autoritet publik duhet të jenë në pajtim me Kushtetutën dhe frymën e saj. Këto veprime duhet të kontribuojnë në mbarëvajtjen dhe bashkërendimin e punëve me interes publik për shtetin, duke mundësuar zhvillimin dhe jetësimin e vlerave e parimeve mbi të cilat është ndërtuar ai”, thuhet në aktvendim.
Gjykata thekson më tej se:
“Çdo pengesë ose mungesë bashkëpunimi në përmbushjen e detyrimeve dhe autorizimeve kushtetuese është në kundërshtim me frymën e Kushtetutës (shih rastin KO72/20, parashtrues Rexhep Selimi dhe 29 deputetë të tjerë, ‘Vlerësim i kushtetutshmërisë së Dekretit të Presidentit të Republikës së Kosovës nr. 24/2020, i 30 prillit 2020’, paragrafët 476–478, si dhe rastet KO193/25 dhe KO196/25, të cituara më lart, paragrafi 107)”.
