Ferizaj – Ish-zëvendësministri i Financave, Mustafë Grainca, ka fituar betejën ligjore kundër Dimal Bashës, i cili u shpall fajtor për shpifje nga Gjykata Themelore e Ferizajt. Bashës iu është shqiptuar dënim financiar prej 25 mijë eurosh, të cilat Grainca tha se do t’i dhurojë për shoqata të dala nga lufta.
Grainca e cilësoi vendimin si një fitore të drejtësisë, duke thënë:
“Drejtësia foli e me aktvendim vërtetoi se ky njeri kishte përdorur aktin më të ulët njerëzor për të më përdhosur e cënuar dinjitetin tim, mbi të cilën fatkeqësisht ngriti vetën politikisht…”
Gjykata ka konstatuar se deklarimet e Bashës në një shkrim autorial në vitin 2019, përfshirë akuzën për “mafinë e betonit”, janë fyese dhe poshtëruese për Graincën dhe nuk përbëjnë vetëm kritika politike, por përbëjnë shpifje ndaj tij si individ.
Ky rast nisi pasi Basha publikoi akuzat në portalin ‘Insajderi’, duke pretenduar keqpërdorime dhe parregullsi në biznesin e ndërtimit në Ferizaj. Pas padisë së Graincës në korrik 2019, procesi ligjor përfundoi me këtë vendim gjyqësor që përbën një precedent në trajtimin e shpifjeve në debatet publike.
