Kryetari i Aleancës për Ardhmërinë e Kosovës (AAK), Ramush Haradinaj, ka reaguar lidhur me situatën e krijuar pas reshjeve të vazhdueshme të shiut, të cilat kanë shkaktuar përmbytje në disa zona të Kosovës.
Përmes një postimi në rrjetin social Facebook, Haradinaj ka theksuar se gjendja është tejet shqetësuese, duke bërë të ditur se në disa vendbanime ka filluar edhe evakuimi i banorëve.
“Situata e krijuar pas reshjeve të vazhdueshme, që kanë shkaktuar përmbytje në disa zona të Kosovës, është tejet shqetësuese. Në disa vendbanime ka filluar edhe evakuimi i banorëve”, ka shkruar ai.
Haradinaj ka bërë thirrje që institucionet relevante, si në nivel qendror ashtu edhe lokal, të rrisin përpjekjet dhe veprimet për përballimin e situatës.
Ai po ashtu ka njoftuar se ka kontaktuar me kryetarët e komunave nga radhët e AAK-së për t’u informuar rreth masave që po ndërmerren nga pushteti lokal.
“Është urgjencë kombëtare që institucionet relevante, si në nivel qendror ashtu edhe lokal, të shumëfishojnë përpjekjet dhe veprimet për përballimin e kësaj gjendjeje”, ka theksuar Haradinaj.
