Përmes një postimi në Facebook, Haradinaj thotë se edhe sot e kësaj dite përgjegjësit për masakrën nuk janë vënë para drejtësisë.
“3 prilli i vitit 1999 është një nga ato ditë të dhimbshme, por edhe të lavdishme të historisë sonë, kur humbëm njerëz të dashur e luftëtarë të shquar të UÇK-së. Në Kralan të Gjakovës, forcat kriminale të Millosheviqit masakruan 86 shqiptarë të pafajshëm – burra, gra, të rinj, e madje edhe fëmijë. Edhe sot e kësaj dite përgjegjësit për masakrën nuk janë vënë para drejtësisë”.
“Po atë ditë, me pushkën e lirisë në dorë, ra heroikisht bashkëluftëtari Arton Mehmetaj – i treti dëshmor nga familja heroike Mehmetaj e Gllogjanit. Bashkë me të, përkrah njëri-tjetrit deri në frymën e fundit, ra edhe Halit Coka nga Kukësi. Kujtojmë me nderim të përjetshëm edhe trimat Visar Myftari, Fehmi Shala, Kujtim Qallakaj, Ilir Hoxha, Mustafë Çeku dhe shumë të tjerë, që me jetën e tyre shkruan historinë e lirisë së Kosovës”, ka shkruar Haradinaj.
“Liria nuk na erdhi vetë, ajo u fitua me gjak e sakrificë ndër breza. Sot, dhe përherë, mbetet detyra jonë ta mbrojmë këtë liri, ta çojmë përpara Kosovën ashtu siç ëndërruan ata që dhanë jetën për të. Lavdi të rënëve për liri!”./Periskopi/
