Duke komentuar ngadalësinë e procesit të dialogut, ai tha se situata aktuale është e kuptueshme, por shqetësuese.
“S’është sekret që ai aktualisht nuk po lëviz aq shpejt. Dhe, nuk është për t’u habitur, duke marrë parasysh mungesën e një Kuvendi dhe të një qeverie me kompetenca të plota këtu. Ne, po ashtu, e kuptojmë se ka shumë zhvillime në Serbi aktualisht, të cilat po marrin shumë vëmendje politike”, u shpreh Hargreaves.
Ai vlerësoi përpjekjet e Bashkimit Evropian, duke theksuar se ekziston gatishmëri për të përgatitur terrenin në mënyrë që dialogu të rifillojë sapo të krijohen rrethanat e duhura.
“Prandaj, është zhgënjyese dhe shqetësuese që dialogu nuk po lëviz shpejt aktualisht. Por, BE-ja ka një përfaqësues të posaçëm të shkëlqyeshëm, dhe një ekip të shkëlqyeshëm, që unë e di se po punojnë fort për të përgatitur terrenin për momentin kur të paraqitet një mundësi më e mirë për të lëvizur përpara.”
Mbretëria e Bashkuar, sipas tij, është plotësisht e angazhuar në përkrahje të këtij procesi.
“Mbretëria e Bashkuar është sigurisht e vendosur për ta mbështetur BE-në në atë proces. Dhe, në ndërkohë, po siguron që kushtet në Kosovë të jenë më të mirat e mundshme, për të mundësuar një mjedis të mirë për këtë.”
Ai gjithashtu nënvizoi se Kosova ka mundësi të ndikojë në mënyrë të drejtpërdrejtë në krijimin e kushteve të favorshme në terren.
“Kjo është diçka që Kosova mund ta bëjë, pavarësisht bisedimeve dypalëshe apo trepalëshe. Por, baza e dialogut do të ndikohet shumë nga kushtet në terren. Dhe, kjo është diçka që unë mendoj se është në kontrollin e Kosovës dhe të qeverisë së saj.”
Dialogu Kosovë–Serbi, i ndërmjetësuar nga Bashkimi Evropian dhe i mbështetur nga partnerët ndërkombëtarë, ka pësuar bllokime të shumta kohët e fundit, veçanërisht pas tensioneve të ngritura në veri të Kosovës dhe krizës politike në Serbi./Periskopi/
