Një grua është arrestuar në SHBA nën dyshimet se është paraqitur si infermiere e licencuar.
Hetimet policore nisën pasi drejtuesit e spitalit vendosën të ndërprisnin kontratën e Autumn Bardisa-s, për shkak të dyshimeve mbi kualifikimet e saj.
Hetuesit zbuluan se 29-vjeçarja kishte ofruar shërbime mjekësore për 4,486 pacientë midis qershorit 2024 dhe janarit 2025.
“Ky është një nga rastet më shqetësuese të mashtrimit mjekësor që kemi hetuar ndonjëherë,” tha sherifi i qarkut Flagler, Rick Staly.
Bardisa ishte punësuar në AdventHealth Palm Coast Parkway në qytetin Palm Coast, nga korriku 2023 deri në janar 2025.
Ajo akuzohet se ka paraqitur dokumentacion të rremë dhe ka përdorur numrin e licencës së një infermiereje tjetër me të njëjtin emër, e cila punonte në një spital tjetër të rrjetit AdventHealth.
Sipas Zyrës së Sherifit, ajo e kishte shpjeguar këtë mospërputhje duke thënë se ishte martuar së fundmi dhe kishte ndryshuar mbiemrin. Kur iu kërkua të dorëzonte certifikatën e martesës, nuk e bëri kurrë.
Në janar, Bardisa u ofrua për një promovim, por një kolege e raportoi tek autoritetet kur zbuloi se licenca e asistentes së infermierisë që ajo kishte përdorur për t’u punësuar, kishte skaduar.
Pas kësaj, kontrata e saj u ndërpre dhe u hap një hetim penal që zgjati shtatë muaj.
Hetuesit lëshuan një urdhër arresti ndaj saj për shtatë akuza për ushtrim të profesionit mjekësor pa licencë dhe shtatë akuza për përdorim të dhënash personale në mënyrë mashtruese.
Ajo u arrestua më 5 gusht, e veshur me uniformë mjekësore (scrubs), në shtëpinë e saj.
“Kjo grua mund të ketë vënë në rrezik mijëra jetë, duke u shtirur si dikush që nuk ishte dhe duke tradhtuar besimin e pacientëve, familjeve të tyre, spitalit AdventHealth dhe të gjithë komunitetit mjekësor,” tha sherifi Staly.
Zyra e Sherifit ka krijuar një adresë emaili të dedikuar: fakenursecase@flaglersheriff.com, për ata që besojnë se janë trajtuar nga 29-vjeçarja.
Bardisa është dërguar në paraburgim në qendrën e ndalimit Sheriff Perry Hall, ku po mbahet me një garanci prej 70,000 dollarësh (rreth 52,000 paundë).
