Ish-aktivisti i Lëvizjes Vetëvendosje dhe njohësi i administratës publike, Muhamet Bytyqi, ka reaguar ashpër ndaj qeverisë përmes një postimi në Facebook, duke e akuzuar pushtetin aktual për mungesë empatie dhe qasje përjashtuese ndaj kundërshtarëve politikë.
Bytyqi ka komentuar edhe sulmin ndaj z. Haradinaj, si dhe lotët e nënës së tij, duke thënë se këto ngjarje tregojnë një atmosferë të rënduar politike dhe mungesë humane nga ana e qeverisjes aktuale.
“Logjika ‘Kurt-eshane’ nuk kursen askënd. Mjafton të mos jesh me ta dhe menjëherë je kundër tyre”, ka shkruar ai.
Sipas Bytyqit, situata aktuale paraqet rrezik të theksuar për shoqërinë, nëse nuk reflektohet në kohë.
“Është koha për t’u këndellur, përndryshe do ta thyejmë qafën në një shoqëri që nuk beson në asgjë”, ka shtuar ai.
Reagimi i tij vjen mes tensioneve të rritura politike dhe debateve publike rreth mënyrës së qeverisjes dhe trajtimit të kundërshtarëve politikë./Qendra.INFO
