Ish-burgu famëkeq i Spaçit është shndërruar këtë fundjavë në një hapësirë reflektimi, kujtese dhe dialogu ndërbrezor, përmes aktivitetit kulturor “Përtej Maskave – Portrete dhe Kujtime”, organizuar nga “Tek Bunkeri” në kuadër të projektit “Shpirtërim”.
Ky aktivitet mblodhi qindra pjesëmarrës nga e gjithë Shqipëria, duke sjellë një qasje të re ndaj historisë së dhimbshme të vendit, përmes artit, dëshmive personale dhe ndërveprimit ndërmjet brezave.
Ekspozita “Maskat që zbulojnë” prezantoi portrete të ish-të burgosurve politikë dhe ish-punonjësve të burgut, të shoqëruara me dëshmi audio që pasqyronin përjetime autentike dhe emocionale, duke tejkaluar narrativat tradicionale mbi diktaturën.
Gjatë ngjarjes u prezantua edhe libri “Terrene – Tetë Vështrime mbi Spaçin”, një botim që kontribuon në dokumentimin dhe kuptimin më të thellë të së kaluarës, duke nxitur dialog shoqëror mbi kujtesën dhe lirinë.
Në program u përfshi edhe filmi i animuar “Antimuzeu”, që eksploron idenë e lirisë dhe ëndrrave të ndaluara përmes një gjuhe simbolike e artistike.
Pjesë e rëndësishme e aktivitetit ishte Biblioteka Njerëzore, një platformë unike ndërveprimi ku të rinjtë patën mundësinë të dëgjojnë rrëfime të drejtpërdrejta nga ata që kanë përjetuar burgun e Spaçit.
Ky projekt u realizua nga Ministria e Turizmit, Kulturës dhe Sportit, me mbështetjen e programit të granteve EU4Culture, të financuar nga Bashkimi Evropian dhe të zbatuar nga UNOPS.
Qëllimi i iniciativës është të nderojë kujtesën e të shkuarës, duke nxitur një reflektim të shëndetshëm shoqëror dhe ndërtimin e një kulture dialogu mbi historinë dhe lirinë në Shqipëri.
/Qendra.info/
