Napoli, 15 tetor 2025 – Ish-presidentja e Kosovës, Atifete Jahjaga, ka zhvilluar një vizitë zyrtare në Komandën e Forcave të Përbashkëta të NATO-s në Napoli, me ftesë të Admiralit Stuart B. Munsch, Komandant i Komandës që mbulon Evropën, Lindjen e Mesme dhe Afrikën.
Gjatë vizitës, Jahjaga ka diskutuar me Admiral Munsch për integrimin e parimeve të Agjendës për Gratë, Paqen dhe Sigurinë në operacionet aktuale dhe të ardhshme të NATO-s, si dhe për roli aktiv të Kosovës si partnere e përkushtuar ndaj paqes dhe stabilitetit në rajon.
Në një postim në Facebook, Jahjaga ka theksuar rëndësinë e kontributit të Aleancës për sigurinë e Kosovës dhe rajonit.
“Admiralin Munsch e përgëzova për punën e jashtëzakonshme të NATO-s dhe të misionit të KFOR-it në Kosovë, që për më shumë se dy dekada kanë garantuar një mjedis të sigurt për qytetarët tanë. Gjithmonë falënderuese për intervenimin e NATO-s në vitin 1999, hap ky që shpëtoi një popull të tërë nga gjenocidi serb dhe hapi rrugën drejt lirisë,” ka shkruar ajo.
Ish-presidentja ka shprehur gjithashtu mirënjohjen për udhëheqjen, partneritetin dhe miqësinë që NATO ka ndërtuar me popullin e Kosovës.
“Bashkëpunimi ynë dëshmon se paqja nuk ruhet vetëm përmes forcave ushtarake, por edhe përmes vlerave të përbashkëta demokratike,” ka përfunduar Jahjaga.
Vizita e saj në selinë e NATO-s në Napoli konsiderohet si një shenjë e përforcimit të marrëdhënieve ndërmjet Kosovës dhe Aleancës Veriatlantike, si dhe e promovimit të përfshirjes së grave në proceset e sigurisë dhe paqes ndërkombëtare.
