Platforma indie e lojërave Itch.io njoftoi këtë javë se ka “deindeksuar” lojërat për të rritur dhe përmbajtjen NSFW (jo të përshtatshme për punë), duke i hequr ato nga rezultatet e kërkimit dhe faqet e shfletimit në sajt.
Vendimi vjen si përgjigje ndaj një fushate të grupit aktivist australian “Collective Shout”, i cili ka kritikuar më parë përmbajtje të ndryshme mediatike, përfshirë videolojëra, reklama të të brendshmeve dhe muzikën rap. Fushata kishte në shënjestër lojën “No Mercy”, e cila përmban skena që portretizojnë përdhunim dhe incest.
Në një letër të hapur drejtuar kompanive si PayPal, Mastercard dhe Visa, Collective Shout akuzoi platformat për lejimin e lojërave që “normalizojnë abuzimin seksual dhe torturën e grave dhe vajzave.” Grupi pyeti se si mundet që përfitimet financiare nga përmbajtje të tilla të jenë në përputhje me vlerat e kompanive financiare.
Fushata duket se pati ndikim: më herët këtë muaj, Steam konfirmoi se do të ndalojë lojëra që “mund të shkelin standardet e vendosura nga përpunuesit e pagesave apo rrjetet bankare.”
Itch.io ndoqi një qëndrim të ngjashëm, duke thënë:
“Që të sigurojmë funksionimin e platformës dhe të mbrojmë marrëdhëniet me partnerët tanë të pagesave, u desh të ndërmerrnim hapa urgjentë drejt përputhshmërisë.”
Platforma sqaroi se “No Mercy” ishte shfaqur përkohësisht në prill, por ishte ndaluar menjëherë. Vendimi për deindeksim, sipas tyre, u mor “në mënyrë të menjëhershme për të mbrojtur infrastrukturën thelbësore të pagesave” pa njoftuar paraprakisht krijuesit.
Aktualisht, Itch.io po kryen një auditim të plotë, për të siguruar që të gjitha lojërat në platformë janë në përputhje me kërkesat e përpunuesve të pagesave. Përmbajtja NSFW do të qëndrojë e fshehur derisa auditimi të përfundojë. Më pas, krijuesit do të duhet të deklarojnë se përmbajtja e tyre lejohet nga politikat e përpunuesve të pagesave që kanë lidhur me llogarinë e tyre.
Vendimi ka nxitur kritika në rrjete sociale, sidomos për rregullat e rrepta që nuk lejojnë apelim dhe sekuestrimin e të gjitha fondeve të llogarive që shkelin rregullat, siç u shpreh një zhvillues:
“Nëse shkelni rregullat, ju marrin krejt paratë. Jo vetëm nga ajo lojë – por çdo para që keni fituar ndonjëherë në platformë.”
Ky nuk është rasti i parë kur kompanitë e pagesave ndikojnë në politikat për përmbajtjen për të rritur. Shembuj të tjerë përfshijnë Gumroad, që kufizoi artin NSFW për shkak të presionit nga përpunuesit e pagesave, si dhe OnlyFans, që përkohësisht ndaloi përmbajtjen eksplicite duke fajësuar partnerët bankarë.
Ndërkohë, një peticion në Change.org me mbi 137,000 nënshkrime kritikon Mastercard dhe Visa për rolin e tyre në “censurimin e përmbajtjes fiktive ligjore” dhe u kërkon të mos bien pre e presionit nga “grupe që nxisin panik moral”.
