Së paku njëri nga nënmunicionet u gjet në pjesën qendrore të Izraelit, sipas ushtrisë izraelite. Ushtria paralajmëroi në një mesazh nga Komanda e Frontit Vendor se mund të ekzistojnë disa nënmunicione të tilla të shpërndara në një zonë të gjerë dhe që mund të shpërthejnë, nëse preken, raporton televizioni CNN.
Tal Inbar, hulumtues i pavarur për politika të hapësirës dhe planifikim strategjik, tha në një postim në rrjete sociale se kjo ishte hera e parë që një kokë shpërthyese kishte rënë në Izrael.
Pranimi nga ushtria izraelite se Irani ka hedhur një raketë me disa koka shpërthyese vjen në kohën kur Izraeli pësoi dëme në disa vende në pjesë të ndryshme të territorit në njërin nga sulmet më domethënëse në disa ditë.
Të enjten, zëdhënësi i ushtrisë izraelite, Effie Defrin, tha se Irani kishte hedhur më shumë se 450 raketa balistike dhe 1 mijë dronë drejt Izraelit. Shumica e dronëve janë nisur nga Irani, tha ai, por disa të tjerë edhe nga grupet që përkrahen nga Teherani në rajon.
Defrini tha se Izraeli kishte shkatërruar rreth dy të tretat e raketahedhësve të Iranit, por paralajmëroi se Teheranit i kanë mbetur edhe më shumë se 100 raketahedhës dhe ende ka mundësi që ta sulmojë Izraelin. Zëdhënësi tha se ushtria izraelite po i sulmon gjithashtu qendrat ku prodhohen raketat balistike në Iran.
“Ky nuk është një operacion i thjeshtë, por është jetik për ne” – tha Defrini në një konferencë për gazetarë./Nacionale
