Presidenti i Serbisë, Aleksandar Vuçiq, ka deklaruar se nuk është optimist për pozicionin aktual të serbëve në Kosovë, por beson se situata e tyre do të përmirësohet në një periudhë prej pesë deri në dhjetë vjetësh.
“Uroj Listën Serbe për rezultatin e jashtëzakonshëm në kushte të pamundura, ku të gjithë të huajt punuan kundër tyre, sidomos ata nga Perëndimi, por edhe mediat kryesore në Serbi. Këta njerëz duruan gjithçka,” – ka thënë Vuçiqi gjatë një interviste për televizionin publik serb RTS, transmeton Paparaci.
Sipas tij, Beogradi do të vazhdojë të ndihmojë komunitetin serb në Kosovë, pavarësisht presioneve ndërkombëtare.
Duke komentuar rezolutën e miratuar në Parlamentin Evropian për Serbinë – e cila, sipas analistëve, është ndër më të ashprat deri më sot – Vuçiq ka thënë se “vendimet e vërteta në BE nuk i merr Parlamenti Evropian, por udhëheqësit kryesorë të Unionit, si Ursula von der Leyen dhe Antonio Costa.”
Ai ka tentuar ta minimizojë rëndësinë e rezolutës, duke thënë se “është miratuar me më pak vota dhe më shumë abstenime se herën e kaluar”, dhe se për këtë arsye “nuk ka ndonjë ndikim real ndaj Serbisë.”
Në fund, Vuçiq ka komentuar edhe kërkesën e BE-së për hetimin e përdorimit të topit shurdhues në protestën e 15 marsit në Beograd.
“Nëse topi shurdhues do të ishte përdorur atë ditë, unë nuk do të isha më president i Serbisë,” – ka thënë ai.
